په بامیان کې د کډوالو په چارو کې د ملګرو ملتونو د عالي کمیشنرۍ په مالي مرسته د یوه منځني ښوونځي د بنسټ ډبره کېښودل شوه

افغان غږ خبری آژانس - بامیان: د بامیان ولایت مقام د یوې خبرپاڼې په خپرولو سره ویلي چې د بامیان والي مولوي عبدالله سرحدي د دغه ښوونځي د پرانیستې په مراسمو کې وویل: موږ او تاسو باید هڅه وکړو چې خپل ځوان نسل ته درس ورکړو او د رسول الله (صلی الله علیه وسلم) په اخلاقو یی سمبال کړو.
 
هغه زیاته کړه: موږ باید هڅه وکړو چې خپل ماشومان په دیني او عصري تعلیماتو سمبال کړو او خپل هیواد په راتلونکي کې د بهرنیانو له اړتیا څخه وژغورو.
 
ښاغلي سرحدي وویل، سیمه ییز چارواکي هڅه کوي چې د ښوونځیو په جوړولو سره د بامیان ولایت د متوازنې ودې ستونزه هواره کړي.
 
د باميانو والي دغه راز د دغه ښوونځي له ښوونکو او د زده کوونکو له والدينو وغوښتل چې د عصري علومو او د اسلامي او ديني احکامو د تدريس په برخه کې خپله پوره هڅه وکړي او هڅه وکړي چې د دغه هېواد هلکان او نجونې د علم او پوهې په وسلو سمبال کړي.
 
  په همدې حال کې د باميان ولايت د پوهنې رييس شيخ نذير جعفري د " کيڼ دره " د منځني ښوونځي د جوړولو پيل د دغه ښوونځي د ماشومانو او زده کوونکو لپاره يوه ستره لاسته راوړنه وبلله او د دغه ښوونځي له ښوونکو څخه يې وغوښتل چې په دې برخه کې خپل کارونه ترسره کړي.
 
د جعفري په وينا، ياد ښوونځى به په ١٥٦٠ متره مربع مساحت کې جوړ شي، چې له دې جملې څخه يواځې ٤٣٥ متره مربع د ښوونځي زيربنا ده.
 
هغه زیاته کړه، دغه ښوونځی ۱۰ درسي ټولګي لري او د لابراتوار او کتابتون لپاره دوه جلا ټولګي په پام کې نیول شوي دي.
 
علي فيضي د دو آب چپه دره د سيمې د خلکو په استازيتوب وويل چې د دو آب چپه دره ښوونځى له نن څخه ٥٣ کاله وړاندې جوړ شوى، خو له دې دود سره سم تر اوسه ترميم شوى نه دى.
 
فيضي د سيمې د خلکو غوښتنه وکړه، چې دغه ښوونځى دې له منځني ښوونځي څخه لېسې ته لوړ کړي او د درسي کيفيت د لوړولو په برخه کې دې هم کار وکړي.
 
د يادونې وړ ده، چې د دغه ښوونځي ځمکه د محمد علي ذالق، محمدنعيم حيدري، محمد حيدري، محمد ذکي نصرالله او حاجي عبدالله په نومونو د دغه ځاى د يو شمېر مخورو له خوا مرسته شوې وه.