د مهاجرینو او راستنیدونکو چارو وزارت چارواکي وایي، په تیرو ۲۴ ساعتونو کې له پاکستان څخه د افغان مهاجرینو د ویستلو په بهیر کې ۶۲۴۲ تنه هیواد ته راستانه شوي دي.

د پاکستان د بلوچستان ایالت د چمن ښار چارواکو اعلان کړی چې په تېرو دوو اونیو کې د چمن - سپین بولدک له لارې ۵ زره کډوال افغانستان ته راستانه شوي دي.

د پاکستان او د اسلامي امارت د حکومت تر منځ د سرحدي تاو تریخوالي له زیاتیدو وروسته ټاکل شوې چې د پاکستان د علماوو څلور کسیزه پلاوی کابل او کندهار ته سفر وکړي چې د اسلامي امارت له مهمو چارواکو سره د دواړو لورو ترمنځ د سرحدي کړکیچ د کمولو په لارو چارو خبرې وکړي.

د پاکستان ګمرک وايي، په تېرو دوو ورځو کې یې له افغانستان او ایران څخه د چمن او تفتان له لارې ۵۰ لارۍ پیاز او رومي وارد کړي دي. دغه کار په کورنیو بازارونو کې د دغو دوو محصولاتو د بیې د لوړېدو لامل شوی دی.