د کابل په هوايي ډګر له قاچاقبرو نیولي ۵۰۰ اثار ملي موزیم ته بیرته تسلیم شول

 ښاغلی تمیم وايي، په دې اثارو کې بیلابېلې سکې، ګوتمۍ او لرګینې مجسمې شاملې وې چې د کابل حامد کرزي هوايي ډګر کې خارج ته له تلونکو مساپرو او قاچاقبرو سره نیول شوي دي.
 په همدې حال کې د ملي موزیم رئیس فهیم رحیمي وايي، د ملي امنیت ځواکونو هم ۱۹ تاریخي اثار له قاچاق څخه ژغورلي او ملي موزیم ته یې تازه سپارلي دي.
 دغې غونډې ته د اطلاعاتو او فرهنګ وزارت معین محمد رسول باوري هم په خپلو خبرو کې له هانګ کانګ څخه د افغانستان د یو قاچاقي اثر د راوړل یاده وکړه: (( دا د خوب په حالت کې د بودا یوه مجسمه ده، چې په ۱۹۹۳ کال د جګړې له کبله له افغانستانه ایستل شوې وه او موږ ته میاشت وړاندې په هانګ کانګ کې د چینايی لرغونپوهانو لخوا وسپارل شوه.))
 ښاغلی باوري وايي، په تېرو ۱۸ کلونو کې د افغانستان لسګونه قاچاق شوي تاریخي اثار هېواد ته راګرځول شوي، خو لا هم لسګونه زره افغاني تاریخي اثار په نورو هېوادونو کې ساتل کېږي: (( زموږ د داخلي جګړو په مهال له افغانستان څخه ۷۰ زره تاریخي اثار قاچاق شوي او له دې منځه راته د امریکا، جاپان، سویس او چین لخوا ډېر کم یې راستانه شوي دي.))
 افغانستان د خپل پنځه زره کلن تاریخي سفر له کبله بې شمېره تاریخي اثار لرل چې لا یې هم د کابل په موزیم کې له ۴۰ زرو زیات اثار  موجود دي خو ګڼ اثار یې د قاچاق له ګواښ سره مخامخ دي.