مجاهد: د ډله ييزو رسنيو قانون به ډېر ژر تصويب شي

افغان غږ خبری آژانس)- کابل: د افغانستان د ازادو خبریالانو ټولنې د اسلامي امارت له ویاند ذبیح الله مجاهد سره د دغه سازمان د مشر د لیدنې په اړه خبرپاڼه خپره کړې ده.

 

د خبرپاڼې د معلوماتو له مخې، په دې کتنه کې د رسنیو د کار د عمومي ریاست، د ډله ییزو رسنیو د قانون د تصویب، د شکایتونو د څېړلو د کمېسیون پر پیاوړتیا او د رسنیو د سرغړونو د مخنیوي په اړه بحث او د نظر تبادله وشوه. د حکومت او رسنیو د ګډو ولایتي کمېټو د پیاوړتیا او په هېواد کې د رسنیو د کار پر وړاندې د نورو مسایلو په اړه خبرې وشوې.

 

په دې کتنه کې د اسلامي امارت ویاند ذبیح الله مجاهد وویل چې د رسنیو او بیان د ازادۍ پیاوړتیا له ملي او اسلامي ارزښتونو سره سم د اسلامي امارت له مکلفیتونو څخه ده او د قانون په تصویبولو یې ټینګار وکړ. په عامه رسنیو کې خورا مهم او اړین دی.

 

د اسلامي امارت ویاند ویلي چې په راتلونکو ورځو کې به د عامه رسنیو قانون تصویب شي او رسنۍ او خبریالان کولای شي چې له مخې یې خپلو کارونو ته دوام ورکړي.

 

تر دې وړاندې ذبیح الله مجاهد ویلي و چې د ډله ییزو رسنیو قانون د اسلامي امارت له لوري تعدیل شوی او د اسلامي امارت د رهبرۍ له لوري د تصویب لپاره کندهار ته استول شوی دی.

 

ښاغلي مجاهد وویل، د رسنیو قانون د بېلابېلو بنسټونو له درېیو ډلو له خوا څېړل شوی او په کې بدلونونه راغلي دي.

 

د ښاغلي مجاهد په وينا، د ډله ييزو رسنيو قانون لومړى د اطلاعاتو او فرهنګ وزارت د يوې کمېټې له خوا، په دويم پړاو کې د فوايد عامې د وزير په مشرۍ د يوې کمېټې له خوا او بيا د عدليې په وزارت کې د يوه کمېسيون له خوا تعديل شوى دى. 

 

د اسلامي امارت ویاند زیاته کړه چې د عامه رسنیو د قانون ځینې مادې بدلې شوې چې د ده په خبره «د اسلامي احکامو خلاف» دي.

 

د يادونې وړ ده، چې د افغانستان د ډله ييزو رسنيو قانون په ٢٠٠٨ زېږديز کال کې د ولسي جرګې له خوا تصويب شو، چې له مخې يې د رسنيو د فعاليت ازادي له اساسي قانون سره برابره تعريف شوې وه.