د اسلامي امارت ویاند ذبیح الله مجاهد ویلي چې د رسنیو نوی قانون طرحه شوی او ډېر ژر به د اسلامي امارت د رهبرۍ له لوري توشیح شي، نوموړی ټینګار کوي چې په دغه قانون کې د رسنیو ټول اصول مراعات شوي دي.

د اطلاعاتو اوفرهنګ وزارت د نشراتو معين حيات الله مهاجر فراهي په ننګرهار ولايت کې په يوه غونډه کې وويل چې اسلامي امارت له هغو رسنيو څخه په جدي توګه ملاتړ کوي چې حقايق انعکاس کوي، خو هيچا ته اجازه نه ورکوي چې د خلکو ذهنونه مغشوش کړي او داسې خپرونې خپرې کړي د اسلامي ارزښتونو او ملي ګټو خلاف دي.

د اطلاعاتو او کلتور وزارت د نشراتو رئیس وايي، د ملګرو ملتونو په منشور کې راغلي چې هر هېواد کولای شي د خپلو ګټو د خوندي کولو لپاره د رسنیو په اړه قوانین وضع کړي، نو اسلامي امارت د رسنیو د اصولو او ارزښتونو د ساتنې لپاره قوانین وضع کړي دي.