د بهرنیو چارو وزارت سیاسي مرستیال په کابل کې د اروپايي ټولنې له شارژدافیر سره په کتنه کې له افغانستان سره د روغتیا، پوهنې او د زیربناوو د جوړولو په برخو کې د اساسي مرستو غوښتنه وکړه.

په دايکنډي کې د استنادي دېوال، د سيلابونو د کنټرول، د اوبو د زېرمه کولو او د بند جوړولو په ګډون د پنځو بنسټيزو پروژو د جوړولو چارې پيل شوې.

د اسلامي امارت د کلیو پراختیا او بیارغونې وزارت سرپرست د یوې نړیوالې مرستندویه ادارې له مسوول سره په کتنه کې وویل چې د افغانستان د خلکو لپاره یوازې بشري مرستې کافي نه دي، نړیواله ټولنه هم باید په زیربنایي برخو کې پانګونه وکړي.

د اقتصاد وزارت سرپرست د افغانستان او ایران د خراسان رضوي ولایت ترمنځ د اقتصادي همکاریو په غونډه کې وویل، چې په افغانستان کې د امریکا د شل کلن حضور او اشغال په موده کې د دغه هېواد زیربناوو ته هېڅ پاملرنه نه ده شوې.

په کابل کښې د ایران د اسلامی جمهوریت د سفارت مرستیال د افغانستان شمالی ولایتونو ته د خپل سفر په دوام کښې د بلخ ولایت له سیمه ایزو چارواکو سره په کتنه کښې د دغه ولایت د زیربناو په پراختیا کښې د پانګونې او مرستې لپاره د خپل هېواد چمتووالی اعلان کړ.