د افغانستان د مرکزي بانک چارواکي وايي، د نویو بانکنوټونو د وېش او د زړو بانکنوټونو د راټولولو بهیر یې پیل کړی دی. دوی همدا راز ټینګار کوي چې په خصوصي بانکونو کې د بانکدارۍ محدودیتونه به په تدریجي ډول لرې شي.

د افغانستان د مرکزي بانک رئیس هدایت الله بدري د رئیس الوزرا د سیاسي مرستیال او سرپرست مولوي عبدالکبیر سره په کتنه کې د نویو بانکنوټونو د چاپ لپاره له بهرنیو شرکتونو سره د مرکزي بانک د هوکړي خبر ورکړ.

د افغانستان مرکزي بانک چارواکي وايي، په تېر کال کې تر یو میلیارد زیات افغانیو نوي بانکنوټونه بازار ته وړاندې شوي او ډېر ژر به د ۵۰۰ او ۱۰۰۰ افغانیو بانکنوټونه بازار ته وړاندې شي.

د هېواد د مرکزي بانک د سترې شورا غړي په نږدې راتلونکي کې بازار ته د نويو بانکنوټونو د راتګ اعلان وکړ. د هغه په وينا، په بازار کې د دغو بانکنوټونو خپرېدل به د ملي اسعارو پر ارزښت اغېز ونه کړي.