پاکستان د آی اس آی پخوانی مشر اسد درانی ممنوع الخروج کړ

پوځ ویلي دي چې د آی اس آی د دې پخواني مشر نه د یو کتاب د لیکلو په خاطر رسمي تحقیقات کیږي.
د پاکستان د پوځ ویاند تورن جنرال آصف غفور ویلي دي چې د پوځي استخباراتو یا آی اس آی پخوانی مشر متقاعد ډګر جنرال اسد درانی نن د پوځ عمومي قوماندانۍ ته جلب کړی و چې د خپل نوي کتاب په اړه توضیحات ورکړي.
دغه کتاب چې د (سپای کرانیکلز) یا د استخباراتو تاریخي پیښې نومیږي اسد دراني د هند د استخباراتو د یو پخواني مشر سره په ګډه لیکلی.
اسد دراني په کتاب کې لیکلي دي چې پاکستان د القاعده د مخکني مشر اسامه بن لادن په وژلو کې د امریکا سره همکاري کړې وه.
متقاعد ډګر جنرال اسد درانی د ۱۹۹۰ نه تر ۱۹۹۲ پورې د آی ایس آی مشر و.