په هېواد کې وروستیو سېلابونو تر ۴۰۰ ډېر کسان وژلي او ټپیان کړي دي

افغان غږ خبری آژانس - کابل: ذبیح الله مجاهد د پنجشنبې په ورځ (سنبله ۳) په کابل کې د یوې خبري ناستې پر مهال د تېرې یوې میاشتې د سیلابونو له امله د اوښتو تلفاتو او زیانونو احصایې له رسنیو سره شریکې کړې.
 
د ښاغلي مجاهد د څرګندونو پر بنسټ، په تېره یوه میاشت کې د هېواد په ۲۰ ولایتونو کې د سېلابونو له امله ۱۸۲ کسان وژل شوي او ۲۵۰ نور ټپیان شوي دي.
 
هغه زياته کړه، چې په وروستيو سېلابونو کې له زرو ډېر څاروي مړه شوي او تر درې زرو ډېر کورونه ويجاړ شوي دي.
 
مجاهد ویلي چې د اسلامي امارت له لوري په ټپیانو باندې د بیړنیو او بشري مرستو لکه خیمو، کمپلو، د پخلنځي لوښو، خوراکي توکو، نغدو پیسو ویش او د ټپیانو د درملنې لړۍ پیل شوې ده.
 
هغه له ملي او نړیوالو بنسټونو وغوښتل چې له زیانمنو شویو سره مرسته وکړي.
 
د اسلامي امارت ویاند ویلي، د اقلیم بدلون د افغانستان په ګډون د سیمې په یو شمېر هېوادونو هم اغېز کړی او په تېرو وختونو کې د سم مدیریت نشتوالي او پرله پسې وچکالیو د خلکو زیانونه زیات کړي دي.
 
د مجاهد د څرګندونو له مخې، له طبیعي پېښو سره د مبارزې وزارت د سېلابونو د مدیریت طرحه کابینې ته وړاندې کړې، چې په نهايي کېدو او پلي کېدو سره به یې د تلفاتو او زیانونو مخه ونیول شي.