پوروړو ته د برشنا شرکت اخطار/ که تاسو خپل پورونه ادا نه کړئ، ستاسو ملکیتونه به وپلورل شي

افغان غږ خبری آژانس: د برشنا ویاند حکمت الله میوندي تېره دوشنبه (میزان ۲۵) په کابل کې د یوې خبري غونډې پر مهال وویل چې د استخباراتو د ریاست په همکارۍ یې د برشنا له پور څخه ۶۸۱ میلیونه افغانۍ راټولې کړي دي.
 
ښاغلي میوندي وویل، دا پیسې له پخوانیو سیاستوالو، زورواکو، شرکتونو، صنعتي او سوداګریزو مرکزونو څخه اخیستل شوي چې د برشنا شرکت پوروړي دي.
 
هغه همداراز ټینګار وکړ، چې لا هم ډېر پورونه پاتې دي، چې نږدې ۵۰۰ میلیونه افغانیو ته رسېږي.
 
خو؛ ښاغلي میوندي ټینګار وکړ چې د پاتې پورونو د راټولولو لپاره د لومړي وزیر په حکم د دفاع او کورنیو چارو وزارتونو او د استخباراتو د عمومي ریاست په غړیتوب یو کمیسیون جوړ شوی دی.
 
میوندي ټینګار وکړ چې لوی پور اخیستونکو ته خبرداری ورکړل شوی چې د دوی ملکیتونه به وپلورل شي که دوی خپل پورونه ادا نه کړي.
 
د هغه په ​​وينا، په تېرو دوو اوونيو کې په کابل ښار کې ٣٢٩ پور ورکوونکي پېژندل شوي، چې ٣٣ کسانو يې ٦٢١٤٨٠٤ افغانۍ پورونه ورکړي دي.
 
هغه ټینګار وکړ چې د هېواد په ټولو زونونو کې د برشنا له پورونو څخه ۶۸۵ میلیونه او ۳۳ زره افغانۍ راټولې شوې دي.