د بهرنيو چارو وزارت: د سفيرانو ادلون بدلون عادي اداري پروسه ده

خبرپاڼې زياته کړې، په مسکو کې د افغانستان سفیر، ډاکټر لطیف بهاند د ماموریت پای د اداري بهیر یوه برخه ده او نوموړی به په کابل کې په نوي ماموریت باندې وګمارل شي.
په خپرپاڼه کې راغلي، افغانستان له فدراتیفې روسيې سره خپلو دوستانه او پرمختيايي اړيکو ته ډېر ارزښت ورکوي او په تيرو ١٩ کلونو کې د تروريزم او نيشه يي توکو په وړاندې مبارزه او په افغانستان کې د سولې بهیر کې د روسيې د مثبت رول ستاينه کوي.
بهرنيو چارو وزارت ټينګار کړی چې له روسيې سره د اړیکو ارزښت په پام کې نیولو سره، به د افغانستان اسلامي جمهوریت په نږدې راتلونکي کې مسکو لپاره بل سفیر وټاکي.
دا په داسې حال کې ده چې تر دې وړاندې يو شمېر هېوادوالو پر حکومت نيوکه کړې وه چې ولې يې په روسيه کې د افغانستان سفير لطيف بهاند له دندې ګوښه کړی دی.