ټرمپ نن عراق او راتلونکو ورځو کې افغانستان کې د سرتېرو کمولو اعلان کوي

پرون رويټرز د يوه لوړپوړي امريکايي چارواکي له قوله راپور ورکړ چې په پام کې ده، د چهارشنبې په ورځ د امريکا ولسمشر ډونالډ ټرمپ په عراق او راتلونکو څو ورځو کې په افغانستان کې د خپلو سرتېرو د کمولو اعلان وکړي.
ټرمپ د خپل کمپاين پر مهال له خلکو سره ژمنه کړې وه چې امریکايي سرتېري به له هغو جګړو راباسي چې پای نه لري او ډېرې اوږدې شوې دي.
له بل لوري امريکا د روان مېلادي کال د فبروري په وروستيو کې په دوحه کې له طالبانو سره په هوکړه کې هم ژمنه کړې چې په ۱۴ مياشتو کې به له افغانستانه خپل ټول سرتېري باسي.
دم ګړۍ امريکا په افغانستان کې څه باندې ۸۰۰۰ سرتېري لري.