په بدخشان کې د کوکنارو د کروندو د له منځه وړلو لپاره د یوې ځانګړې طرحې ټاکل؛ ۷۰ جریبه ځمکه له کوکنارو پاکه شوه

افغان غږ خبری آژانس - مزارشریف: افغان غږ خبری آژانس ته د بدخشان د سیمه ییزو چارواکو د معلوماتو له مخې، دغه ځانګړی قطعه د بدخشان ولایت د امنیه قومندانۍ له نشه یی توکو سره د مبارزې مدیریت له خوا د استخباراتو له ریاست سره په همغږۍ جوړه شوې ده.
 
معلومات ښیي، چې د دغو عملیاتو په لومړۍ ورځ د کشم ولسوالۍ په ګندم کل سیمه کې ۷۰ جریبه ځمکه له کوکنارو پاکه شوې ده.
 
د دوی په خبره، په بدخشان کې د کوکنارو تر بشپړ له منځه وړلو پورې به د ځانګړې برخې فعالیت دوام ولري.
 
دا په داسې حال کې ده، چې سږ کال په بدخشان کې په پراخه کچه کوکنار کرل شوي او د ارګو، خشک، افتال پایان ولسوالیو او د فیض اباد ښار په ځینو برخو کې له ۹۰۰ جریبه زیاته ځمکه له کوکنارو پاکه شوې ده.
 
د کورنيو چارو وزارت د نشه يي توکو پر وړاندې د مبارزې قوماندان فواد ابوبکر چې په شمال ختيځ زون کې د کوکنارو د کروندو د له منځه وړلو په موخه پرون (چهارشنبه د ثور ١٣مه) بدخشان ته سفر کړى و، وويل: د اسلامی امارت د رهبرۍ د حکم اساس له لوري د هیواد په ټولو ولایتونو کې د کوکنارو د کروندو د له منځه وړلو په موخه عملیات روان دي او دا لړۍ به د تریاکو د کښتونو تر له منځه وړلو پورې دوام وکړي.