په سویډن کې د قرآن سوځول یو کرکه او توهین کونکی عمل دی!

په سویډن کې د لوی اختر په مناسبت د قران کریم د یو ځل بیا بې حرمتۍ نه وروسته د اسلامي امارت د بهرنیو چارو وزارت په دغه هیواد کې د قران کریم د نسخو سوځول یو کرکه او سپکاوی بللی او په کلکه یې غندلی دی.

افغان غږ خبری آژانس - کابل: د اسلامي امارت د بهرنیو چارو وزارت ویاند عبدالقهار بلخي پرون پنجشنبه (سرطان ۸) په یوه ټوېټ کې لیکلي چې د سویډن چارواکو اجازې او د هغوی ملاتړ په کلکه غندي.

بلخي د اسلام په سپېڅلو ورځو کې د دې کار اجازه د سویډني چارواکو له خوا اسلام او نږدې دوه میلیارده مسلمانانو ته سپکاوی وباله.

هغه زیاته کړې: "موږ پر ټولو مسلمانو حکومتونو او سازمانونو په ځانګړې توګه د اسلامي همکاریو پر سازمان غږ کوو، چې په ټوله نړۍ کې د دغه ډول کرکې ډکو اعمالو په ځواب کې ټول اړین اقدامات وکړي."

د راپورونو له مخې د چهارشنبې په ورځ د سویډن په پلازمېنه ستاکهولم کې دوو کسانو د یوه جومات مخې ته قرآن کریم ته اور ورته کړ. سویډني رسنیو ویلي دي چې د دغه هیواد د محکمې له خوا د قرآن کریم د سوځولو اجازه صادره شوې ده.

دا لومړی ځل نه دی چې په سویډن کې د قران کریم نسخې د خلکو لخوا سوځول کیږي. تېر کال د راسموس پالودان په مشرۍ ځینو ښي اړخو افراطي ډلو په ستاکهولم کې د ترکیې د سفارت مخې ته د قران کریم نسخې سوځولې وې.

هغه مهال په افغانستان کې د ملګرو ملتونو د مرستندویه پلاوي دفتر (یوناما) ویلي وو، چې په سویډن کې د قرآن کریم سوځول د اسلام د پیروانو سپکاوی او سپکاوی دی او باید د بیان له ازادۍ سره تړاو ونه لري.