سږ کال په کابل کې د ۵ میلیارد او ۲۴۰ میلیونه افغانیو په ارزښت بېلابېلې پروژې پیل شوې دي

د کابل ښاروالۍ ریاست چارواکي وايي، سږ کال له داخلي عوایدو څخه د ۵ ملیارده او ۲۴۰ میلیونه افغانیو په ارزښت ګڼې پروژې پلې شوې، چې په کې د سړکونو د جوړولو، د سړکونو د اسفالټ کولو او داسې نورو چارې شاملې دي، چې ځینې یې بشپړې شوي او پاتې نورې هم روانې دي.

افغان غږ خبری آژانس – کابل: د کابل ښاروالۍ د فواید عامې رئیس نعمت الله بارکزي د دوشنبې په ورځ د عقرب په ۱۵ مه له افغان غږ خبری آژانس سره په مرکه کې وویل چې سږ کال دغه ریاست ۱۵۰ پروژې درلودې چې ۸۱ یې د سړکونو او کانالونو جوړول دي.

د ښاغلي بارکزي په وینا، د سړک جوړونې د ۸۱ پروژو له جملې څخه یې ډېری یې بشپړې شوي او د روان کال تر پایه به ۱۸ پروژې بشپړې شي.

بارکزي زياته کړه، چې د دغه رياست په يو کلن پلان کې د سړک جوړولو ٢٠٠ کانکريټي پروژې هم شاملې دي، چې له دې جملې څخه ٤٥ پروژې بشپړې شوې او ٩٠ پروژې به د روان کال تر پايه بشپړې شي. هغه په دوام وويل چې په راتلونکي کال کې به ٦٥ نورې پروژې هم پيل شي.

د کابل ښاروالۍ د فوايد عامې رييس وويل، چې د کابل ښار د داخلي حلقوي سړک کار هم روان دى. هغه وویل چې په راتلونکو څو ورځو کې به په کابل ښار کې د سړک جوړونې د شپږو سترو پروژو کار پیل شي.

په همدې حال کې د ښاري چارو کارپوه ډاکټر اقبال افغان غږ خبری آژانس ته وويل، چې په تېرو دوو کلونو کې د کابل ښاروالۍ په اداري کارونو کې ډېر بدلونونه راغلي دي. له همدې امله ډیری پروژې چې په عمده توګه د مدیریت لخوا پیل شوي په کابل ښار کې پیل شوي.

ښاغلي اقبال زیاته کړه چې په تېرو دوو کلونو کې د کابل ښار د "ښاري ترافیک او ګڼې ګوڼې" په کمولو کې د سړکونو جوړول او د دې سړکونو په اوږدو کې د پلورونکو تګ راتګ ګټور تمام شوی دی.

دغه ښاري کارپوه همدارنګه زیاته کړه، چې د کابل ښاروالۍ دندې که څه هم په تېرو دوو کلونو کې د قناعت وړ وې؛ خو په دغه ښار کې د زيات نفوس له امله د دې رياست لپاره د ټولو چارو سمبالول ډېر ستونزمن دي.

خو د کابل ښار يو شمېر ښاريان د کابل ښاروالۍ له دوه کلنو دندو د خوښۍ په څرګندولو سره وايي، چې په کابل ښار کې ګڼې پروژې په ځانګړې توګه د سړکونو د جوړولو چارې پيل شوې، چې ګټورې تمامې شوې دي.

د کابل ښار یو تن اوسېدونکی عباس وايي: "ښاروالۍ په دوو کلونو کې ډېر کارونه کړي او ډېر سړکونه یې اسفالټ کړي او موږ له کارونو راضي یو."

د کابل يو بل اوسېدونکی حفيظ الله وايي چې په تېرو دوو کلونو کې ډېر سړکونه جوړ شوي دي. نوموړی له چارواکو غواړي چې د غیر پلان شویو سیمو لپاره هم اغېزمن پلانونه ولري.

د یادولو وړ ده چې په افغانستان کې د اسلامي امارت له تسلط وروسته که څه هم په پلازمینه کې ګڼې پروژې په لاره اچول شوي دي خو د کار نشتوالی د هیوادوالو په ځانګړې توګه د ځوانانو پر وړاندې یو له لویو ننګونو څخه شمیرل کیږي.