د ورېښمو له پولې څخه د تېلو ۱۰ ټانکرونه بېرته ایران ته راستانه شول

افغان غږ خبری آژانس - هرات: د نیمروز ولایت د خدمتونو او د تیلو او ګازو د واردولو رئیس مولوی نقیب احمد خالد وایی چې د ورېښمو له لارې د بې کیفیته تېلو ۱۰ ټانکرونه چې ۲۵۰ ټنه دی، مسترد شول.

هغه زياته کړه، دغه ټانکرونه له بيا کتنې وروسته بېرته ايران ته لېږدول شوي او له سوداګرو يې غوښتل شوي، چې هېواد ته د بې کيفيته توکو له واردولو ډډه وکړي.

ويل کيږي چې د ټيټ کيفيت لرونکو توکو د را واردولو په کميټه کې د ولايت مقام، د استخباراتو او ګمرکونو رياستونو، د خدمتونو د تنظيم او د نفتو او ګازو د واردولو، د کميسون ادارې او د ملي سټنډرډ ادارې استازي شامل دي.