د افغانستان ولسي جرګې په محابسو او توقیف ځایونو کې د شکنجې د مخنیوي د قانون په برخه کې د ولسمشر تقنیني فرمان د رأیو په اکثریت تصویب کړ.
دغه فرمان ته د ولسي جرګې دعدلي او قضایې کمېسیون له خوا په یو شمېر مادو کې د تعدیلاتو د راوستو وروسته نن شنبه په عمومي غونډه کې رأیې ورکړل شوې.
د دغه کمېسیون مشر سید محمد حسن شریفي بلخابي وایي، د دې قانون تطبیق به د عدالت د ټینګښت او په محابسو او توقیف ځایونو کې د ځورونې او شکنجې په مخنیوي کې اغېزمن تمام شي.
ولسي جرګې دغه راز د محابسو او توقیف ځایونو د قانون په شپږمه او۱۳مه ماده کې تعدیلات راوستي دي.
دغه مواد له وړاندې د حکومت له لورې د بحث لپاره ولسي جرګې ته استول شوي وو.
ولسي جرګې همداراز د شنبې د ورځي په عمومي غونډه کې یوځل بیا پر حکومت غږ وکړ چې په حکومتي ادارو کې د سرپرستۍ بهیر پای ته ورسوي او د پاتې څلورو وزارتونو او د سترې محکمې د عالي شورا د غړو لپاره کاندیدان ژر تر ژره ولسي جرګې ته د باور رأیې اخيستلو لپاره معرفي کړي.
