ډونلډ ټرمپ پر روغتیا نړیواله اداره مرسته بندوي

د امریکا ولسمشر خپله په کور کې هم له دې وبا سره د مقابلې د څرنګوالي له امله له نیوکو سره مخ دی.
نوموړي سپینه ماڼۍ کې د کورونا وېروس په هکله خپل ورځني خبري کانفرنس کې وویل:
"حکومت ته مې امر وکړ چې پر روغتیا نړیواله اداره بودیجه ودروي، چې د کورونا وېروس خپرېدو کې د دې ادارې په سخت بد مدیریت او پر بشپړ خپراوي یې د پردې اچولو رول وارزول شي.
د هغه په خبره:"د روغتیا نړیواله اداره د خپلو لومړنیو دندو تر سرولو کې بریالۍ نه وه او باید ځواب ووايي".
امریکا دا مهال نړۍ کې د کورونا وېروس د خپرېدو تر ټولو لوی مرکز دی؛ په دې وېروس پکې پنځه لکه شپږ نوي زره کسان اخته شوي او تر پنځه ویشت زرو ډېر ترې مړه شوي دي.