په هیواد کې د سیکانو او هندوانو د معبدونو امنیت تامینوو

افغان غږ خبری آژانس - کابل: ملا عبدالواسع؛ د اسلامي امارت د لومړي وزیر د دفتر عمومي رئیس پرون یکشنبه (اسد ۲) د هندوانو او سکانو د شورا له یو شمېر غړو سره وکتل او له هغوی یې وغوښتل چې په افغانستان کې پاتې شي.
 
هغه وويل: "افغانستان د ټولو افغانانو ګډ کور دى او تاسو هم د دې ملت برخه ياست او ستاسو د ستونزو د هواري لپاره به هېڅ ډول هڅې ونه سپموو."
 
د اسلامي امارت د لومړي وزیر د دفتر مسئول د دغه هیواد د سیکانو او هنديانو استازو ته په خطاب کې وویل: د عبادت ځایونو د امنیت د تامین او د هغوی د ځمکو د غصبولو د ستونزو په هواري کې به له هیڅ ډول هڅو څخه دریغ ونه کړي.
 
عبدالواسع دغه راز له ټولو هغو هنديانو او سکانو څخه چې د امنيتي ستونزو له امله له افغانستان څخه هندوستان ته تللي دي وغوښتل چې خپل ژوند ته د دوام ورکولو لپاره دې هېواد ته راستانه شي.
 
دا په داسې حال کې ده چې تېره میاشت داعش په کابل کې د سیکانو پر عبادت ځای د ځانمرګي برید په ترڅ کې په نښه کړ. له دې برید وروسته هند اعلان وکړ چې افغان سیکانو او هندوانو ته به بېړنۍ ویزې ورکوي.