د ولسمشرۍ ماڼۍ څخه په یوه خپره شوې خبر پاڼه کې راغلي چې ولسمشرغني په جلا حکمونو کې د دفاع وزارت د ستر درستیز د ارکان رئيس ډګر جنرال عبدالله حبیبي د دفاع وزارت د سرپرست په توګه، او محمد معصوم ستانکزی د ولسمشر د سلاکار او همداراز د ملي امنیت د عمومي رياست د سرپرست په توګه ټاکلي دي.
خو تراوسه نه دي ویل شوي چې عبدالله او ستانکزی به کله د اعتماد رایې د ترلاسه کولو لپاره ولسي جرګې ته معرفی شي.
ستانکزی په داسې حال کې د ملي امنیت سرپرست په توګه پيژندل شوی دی چې څه موده وړاندې د ولسي جرګي څخه د ملي دفاع وزارت لپاره يې د باور رايې تر لاسه نه کړی.
د معصوم ستانکزي لنډه پيژندنه:
ښاغلی معصوم ستانکزی د مرحوم محمود خان ستانکزي زوی په ۱۳۳۷ لمریز کال د لوګر ولایت د محمد آغې ولسوالۍ په مغل خيلو کلي کې زیږیدلی دی.
ښاغلی ستانکزی وروسته له هغې چې خپلې لومړنۍ زده کړې یې د محمد آغې ولسوالۍ د ده نو په ښوونځي کې بشپړې کړې د کابل د مخابراتو په ښوونیزې مؤسسې کې شامل او د مایکروویو په څانګه کې یې تر ۱۴ ټولګي پورې زده کړې وکړې.
د مکلفیت دورې له پای ته رسولو وروسته یې د حربي پوهنتون د مخابرې په څانګه کې پوځي زده کړې کړې او ورسره یې د افسرانو په عالي کورس کې د قرارګاه، د حرب اداره او قوماندانۍ درسونه بشپړ کړیدي.
نوموړيپه ۱۳۷۹ لمریز کال کې خپل لومړنۍ ماسټري د مدیریت او ادارې په څانګه کې له پریستون پوهنتون څخه اخیستې او دویمه ماستري یې په ۱۳۸۵ لمریز کال د پایدار (اوږده) پرمختګ د انجنیرۍ په څانګه کې د انګلستان هیواد له کیمبرج پوهنتون څخه ترلاسه کړې .
همدا راز نوموړي د ملي دفاع وزارت د تشکیلاتو او اوپراسیون ریاستونو په چوکاټ، د غنډ د قوماندان او د فرقې د معاون په توګه دنده ترسره کړې ده.
نوموړی څه موده د ملي دفاع وزارت کې دسرپرست په توګه دنده ترسره کړې ده.
ښاغلیعبدالله حبیبي لنډه پيژنده:
ښاغلیعبدالله حبیبي د دغلام حبیب زوی په ۱۳۳۱ لمریز کال د کونړ ولایت د څوکۍ ولسوالۍ کې زیږیدلی دی.
نوموړی وروسته د لومړنیو زده کړو ۱۳۴۲ کال کې حربي پوهنتون کې شامل او ۱۳۴۸ فارغ شو.
حبیبي په کال ۱۳۴۸ د حربي پوهنتون د طوپچي پوهنځي زده کړیال شو او ۱۳۵۱ د لیسانس په درجه فارغ شو.
نوموړی په ۱۳۵۵ کال کې د لوړو زده کړو پشپړولو لپاره څه موده بهرته ولاړ، وروسته د لوړو زده کړو د ماستری په درجه نظامي علومو برخه کې په کال ۱۳۵۹ کې بیرته هیواد راستون شو.
نوموړی د حربي پوهنتون استاد، د ۲۸غنډ د قوماندان ۱۷ فرقې،سرحدي او اوپراسیون امر، سرحدي قواوو مرستیال، د سرحدي قوماندانې قواوو لومړی مرسیال، دسرحدي قواوو عمومومي قوماندان، دملی دفاع وزارت د ښونې او روزنې لومړي ریاست، د ۲۰۱ سیلاب قول اردو قوماندان او په دې وروستیو کې ملي دفاع وزارت کې د لوى درستيز ريس ارکان، په توګه دنده ترسره کړې ده.
