پاکستان کابل کې د وېزې ورکولو څانګه وتړله

دغه سفارت د «نومبر پر ۳مه» په یوې اعلامیې کې ویلي، چې دا کار یې په افغانستان کې خپلو مامورینو ته د متوجه امنیتي ګواښونو له امله کړی دی.
بلخوا د پاکستان د بهرنیو چارو وزارت هم پرون یکشنبه په هغه هېواد کې له افغان شارزدافیر سره په دې اړه خپل اندېښنه شریکه کړې ده.
د پاکستان د بهرنیو چارو وزارت په یوې اعلامیې کې ویلي، چې په تېرو دوو ورځو کې په کابل کې د دوی د سفارت کار کوونکي او مامورین سفارته پر لار خپلو موټرو کې ځورول شوي او موټرسایکلونه ورسره جنګول شوي دي.
پاکستان له افغان حکومت څخه غوښتي، چې د ویانا د دیپلوماټیکو امتیازاتو د ۱۹۶۱کنوانسیون له مخې د ټولو پاکستاني دیپلوماټانو امنیت خوندي کړي.
دغه هېواد همدارنګه له افغان شارزدافیر څخه غوښتي، چې هېواد یې پاکستاني دپیلوماټو ته د متوجه امنیتي ګواښونو په اړه پلټنې وکړي او د هغوی د امنیت په اړه ډاډ ورکړي.