په افغانستان کې ښوونیزو موسسو ته د بسپنه ورکوونکو لپاره اسانتیاوې برابرې شوې دي

افغان غږ خبری آژانس: د پوهنې وزارت نن پنجشنبه (میزان ۷) د یوې خبرپاڼې په خپرولو سره ویلي چې د پوهنې وزارت نوي سرپرست مولوي حبیب الله آغا د افغانستان لپاره د ملګرو ملتونو د ماشومانو د ملاتړ ادارې (یونیسف) له مشر محمد ایویا سره وکتل. د افغانستان او ماشومانو پر وضعیت خبرې وشوې.
 
په دې کتنه کې مولوي حبیب الله آغا وویل: یونیسف له څو کلونو راهیسې په افغانستان کې د پوهنې په برخه کې ډېر خدمتونه کړي، چې موږ یې منندوی یو.
 
هغه دا هم وویل چې موږ د ټولو لارښوونو او نړیوالو خیریه موسسو د پروګرامونو د تطبیق لپاره اسانتیاوې برابروو چې د افغانستان د پوهنې له نظام سره مرسته کوي.
 
محمد ایویا دغه راز په افغانستان کې د یونیسف له خوا د ترسره شویو ښوونیزو فعالیتونو په اړه هم یادونه وکړه او ویې ویل چې دغه اداره تل د افغانانو له ښوونې او روزنې سره مرسته او همکاري کوي.
 
هغه دا هم ویلي چې پر دې سربېره به نور نړیوال مرستندویان وهڅوي چې د افغانستان د پوهنې له نظام سره مرسته وکړي.