د محرم د مراسمو د امنیت په تامینولو لپاره د بلخ د سیمه ایزو چارواکو ټینګار؛ هیڅ محدودیتونه ندي لګول شوي

افغان غږ خبری آژانس - مزار شریف: د بلخ ولایت رسنیز مرکز د یو راپور په خپرولو سره اعلان کړی چې د بلخ ولایت د مرستیال والی او ځیني شیعه علماوو په حضور کې پرون (شنبه،  سرطان ۲۴) د ولایت په مقام کې غونډه جوړه شوه.
 
په دې غونډه کې ټینګار وشو چې د اسلامي امارت د رهبرۍ له حکم سره سم باید د محرم په ورځو کې د شیعه ګانو امنیت ته جدي پاملرنه وشي، ترڅو دوی له کومې ستونزې سره مخ نه شي.
 
په دې کتنه کې د بلخ مرستيال والي نورالهدي ابو ادريس وويل: شيعه ګان زموږ هېوادوال دي او موږ به په پوره امانتدارۍ او ايماندارۍ سره د هغوى د امنيت د تامينولو لپاره هلې ځلې وکړو، څو د محرم ورځې په ښه توګه تېرې کړو.
 
په همدې حال کې یو شمېر رسنیو اوازې خپرې کړې چې حکومت د محرم په مراسمو کې محدودیتونه لګولي، خو د بلخ د والي ویاند حاجي زید افغان غږ خبری آژانس ته وویل چې د محرم په اړه د بندیزونو خبره سمه نه ده.
 
دا په داسې حال کې ده، چې تېر کال هم په بلخ کې د امنيتي ځواکونو له خوا د محرم د مراسمو امنيت په بشپړ ډول چمتو شوى و.