د سولې عالي شورا د قومي مشرانو په مرسته طالبان سولې ته هڅوي

د افغانستان د سولې د عالي شورا یوچارواکی وایي، دا شورا که څه هم له طالبانو سره مستقیم تماس نه لري خو هڅه کوي، چې د قومي مشرانو او مخورو له لارې، چې پرطالبانو نفوذ لري، له هغوی سره اړیکه ټینګه کړي او دې ته یې وهڅوي، چې د خبرو میزته حاضر شي.

د سولې د عالي شورا یوه غړي ارسلا رحماني له ازادي راډیو سره په خبرو کې وویل، چې دا شورا په یوه اسلامي هیواد کې د طالبانود سیاسي د فتر د پرانستلو ملاتړ کوي څو دوی وکولای شي؛ چې د دې دفتر له لارې مستقیما له طالبانو سره د سولې خبرې پرمخ یوسي.

هغه وویل، طالبانو هم دا سې نښې ښکاره کړي، چې غواړي په یوه اسلامي هیواد کې د ځان لپاره سیاسي دفتر پرانیزي.

په عین حال کی د افغانستان د بهرنیو چارو وزیر پرون یوځل بیا په دې ټینګار وکړ، چې هغه خبرې به هیڅکله هم نتیجه ورنه کړي، چې افغانان یې مشري ونه کړي.