د کندهار ولايت د اطلاعاتو او کلتور رئيس انعام الله سمنګاني په دغه ولايت کې د مطبوعاتو د آ‌زادۍ د نړيوالې ورځې د نمانځنې په مراسمو کې وويل چې رسنۍ د ټولنې د بهبود لپاره کار کوي او دولت د رسنيو له کار څخه راضي دى. هغه زیاته کړه، موږ له رسنیو څخه غوښتنه کوو، چې خپلې ستونزې له حکومت سره په تعامل او همکارۍ حل کړي.

د افغانستان له آزادو رسنیو څخه د ملاتړ اداره (نی) د مطبوعاتو د آزادۍ د نړیوالې ورځې په مناسبت د یوې اعلامیې په خپرولو سره ټینګار کړی چې په افغانستان کې د رسنیو او خبریالانو آزاد فعالیت باید د بشری حق په توګه تضمین شی. نړیوال ملاتړ کولی شي د بنسټیزو ارزښتونو ساتنه وکړي لکه د بیان آزادي، معلوماتو ته د لاسرسي تضمین او د افغان رسنیو آزاد فعالیت.