له افغان شخصیتونو سره د اړیکو د کمېسیون د دارالانشا چارواکي وايي، یو شمېر نورو سیاسي څېرو او د پخوانۍ ادارې چارواکو ته یې د معافیت کارتونه وېشلي دي.

د رئیس الوزرا دفتر پرون ٧٣٥ پخوانيو سياسي او پوځي چارواکو ته چې هېواد ته راستانه شوي دي د معافيت کارتونه ويشل.

له شخصیتونو سره د اړیکو کمېسیون ویاند وايي، له شخصیتونو سره د تماس او هېواد ته د هغوی د راستنېدو د کمېسیون طرزالعمل په ۱۵ مادو کې نهايي شوی او د نظام د تعقیب او د پالیسۍ پر وړاندې د چلند د نه منلو مسئله یوه ده.

له افغان شخصیتونو سره د اړیکو د کمېسیون د شمېرو له مخې، په تېرو درېیو میاشتو کې له ۱۰۰ ډېر سیاسي شخصیتونه او پخواني دولتي کارکوونکي افغانستان ته راستانه شوي دي. د دغه کمیسیون د معلوماتو له مخې، په راستنو شویو کې وزیران، واليان او بېلابېل شخصیتونه شامل دي او دا بهیر په چټکۍ سره دوام لري.

په افغانستان کې د ملګرو ملتونو استازي د کانونو او پټرولیم له سرپرست وزیر سره وکتل. په دې ناسته کې د ملګرو ملتونو سازمان استازي د ټولو افغانانو د حقونو پر ساتنې ټینګار وکړ او ویې ویل، هغه افغان سیاستوال چې هېواد ته راستانه شوي باید په نظام کې برخه واخلي.

د تخار سیمه ییز چارواکي وايي، د دغه ولایت د والي په هڅو د تېر حکومت د امنیتي ځواکونو اته غړي بېرته خپلو کورونو ته ستانه شوي دي.