په بغلان، بدخشان او جوزجان کې د مطبوعاتو د آزادۍ ورځ ولمانځل شوه

افغان غږ خبری آژانس - مزارشریف: د مطبوعاتو د آزادۍ نړیواله ورځ د می میاشتې دریمه نیټه پرون (چهارشنبه د ثور ۱۳مه) د بغلان، بدخشان او د آزادو خبریالانو د اتحادیې د اطلاعاتو کلتور رئیس او خبریالانو په شتون کې ونمانځل شوه..
 
دبغلان د اطلاعاتو اوفرهنګ رييس اسدالله مصطفى هاشمي په دغه ولايت کې په جوړو شويو مراسمو کې وويل چې ددغه ولايت د رسنيو لپاره بيلابيلې اسانتياوې برابرې شوې دي.
 
د بغلان د والي وياند، عالم مجيدي هم وويل، رسنۍ بايد د فرهنګي، ټولنيزو او ديني ارزښتونو په چوکاټ کې خپرونې وکړي.
 
دغه راز د افغانستان د خبريالانو د ملي اتحاديې له خوا د جوزجان په مرکز شبرغان ښار کې د اطلاعاتو او فرهنګ رياست د تعليمي مرکز په تالار کې د مطبوعاتو نړيواله ورځ ونمانځل شوه.
 
د جوزجان د اطلاعاتو او کلتور رئیس سیف الدین معتصم وویل، حکومت له رسنیو او خبریالانو سره له هر راز همکارۍ څخه دریغ نه کوي او د اسلامي امارت د پالیسۍ له مخې همکاري کوي.
 
د دې تر څنګ د بدخشان ولایت مقام مرستیال نثار احمد احمدي هم په فیض آباد ښار کې په جوړو شویو مراسمو کې وویل چې د اسلامي امارت سیمه ییز حکومت تل له رسنیو ملاتړ کړی او په هره برخه کې چې امکان لري همکاري کوي.
 
د بدخشان د استخباراتو رئیس معیز الدین احمدي هم په دغه ولایت کې د رسنیو فعالیتونه تائید کړل او ویې ویل چې په دغه ولایت کې د مطبوعاتو ستونزې او ننګونې په وخت سره حل کیږي.
 
د يادو ولايتونو خبريالانو د ننګونو او اقتصادي ستونزو او اطلاعاتو ته د نه لاسرسي په اړه اندېښنه وښوده او د حل غوښتنه يې وکړه.