د رئیس الوزرا سیاسي مرستیال مولوي عبدالکبیر په افغانستان کې د ناروې سفارت له شارژدافیر سره په کتنه کې وویل چې اسلامي امارت د نړۍ له ټولو هېوادونو سره د ښو اړیکو غوښتونکی دی. هغه همداراز ټینګار وکړ چې TTP په افغانستان کې ځای نه لري او داعش د انسانیت د دښمن په توګه ځپل شوی دی.

د پاکستان د بهرنیو چارو وزارت وايي، د دغه هېواد پالیسي باثباته ده او اسلام اباد له خپل ګاونډي افغانستان سره د دوستانه اړیکو غوښتونکی دی.

پخواني ولسمشر له پاکستانه وغوښتل چې افغانستان ته له ګواښونو لاس واخلي. دده په وینا؛ د پاکستان خلک د افغانستان ګاونډي وروڼه دي، خو د پاکستان اوسنی وضعیت او ناامني تر ډېره د پاکستان د حکومت د سیاست پایله ده.

د پاکستان د پوځي ځواکونو او د تحریک طالبان پاکستان (TTP) تر منځ د ترینګلتیا له زیاتېدو او د پاکستان د کورنیو چارو د وزیر له ګواښ وروسته چې په افغانستان کې د تحریک طالبان پاکستان پر ضد اقدام وکړي، د امریکا د بهرنیو چارو وزارت ویاند د اسلام اباد د پلان ملاتړ وکړ.

د پاکستان د بهرنیو چارو وزیر بلاول بوټو زرداری د واکمن ګوند له چارواکو سره په لیدنه کې له تحریک طالبان پاکستان او اسلامي امارت سره د خبرو په اړه هر ډول پرېکړه پارلمان ته وسپاره.