په غور ولایت کې د اسلامي امارت سیمه ییز چارواکي وايي، د کابل - غور پر لویه لاره د کوتل بیک سیمه تېره شپه د واورې ورښت له امله د ترافیکو پرمخ تړل شوې ده.

د اسلامي امارت د فواید عامې وزارت اعلان کړی چې د سختې واورې وریدو له امله د کابل - غور لویه لار او د دغه ولایت ترانسپورتي لارې د ترافیکو پر مخ تړل شوي او د سیمې پاکول لاهم روان دي.

د بغلان سیمه ییز چارواکي وايي، د واورې ورښت له امله د دغه ولایت د خوست، فرنګ او ګذرګاه نور ولسوالیو ترانسپورتي لارې بندې شوې چې له امله یې تر ۵۰ ډېر کسان په دغو لارو بند پاتې وو چې د امنیتي ځواکونو له خوا ژغورل شوي دي.

د هوا پېژندنې ادارې د هېواد په ۱۲ ولایتونو کې د سختو واورو او بارانونو د احتمال په اړه خبرداری ورکړی دی.

د هوا پېژندنې ادارې اعلان کړی، چې نن (سه شنبه، جدي ۲۰) او سبا د هېواد په یو شمېر ولایتونو کې د سختو بارانونو امکان شته.