کورنیو چارو وزارت د بښنې نړیوال سازمان د یوه چارواکي هغه ادعا رد کړه چې ګواکې په کابل او نورو ځایونو کې د اسلامي امارت له خوا د ۶۲۰۰۰ امنیتي کامرو نصبول د خلکو له محرمیت څخه سرغړونه ده، د کورنیو چارو وزارت ویلي چې د امنیتي کمرو نصبول نه یوازې په افغانستان کې بلکې په نړۍ کې یوه عادي خبره ده.

په پاکستان کې د افغانستان سفارت اعلان کړی چې د پاکستان په زندانونو کې له دوه زره افغان کډوالو څخه شاوخوا ۵۰۰ یې خوشي کړي دي. د دې ادارې په وینا، د پاتې ۱۵۰۰ پناه غوښتونکو د خوشې کولو هڅې دوام لري.

د بښنې نړیوال سازمان عمومي منشي د پاکستان لومړي وزیر ته په یوه لیک کې ویلي، چې په پاکستان کې د کډوالو د وضعیت د خوندیتوب لپاره د ملي قوانینو د نشتوالي له امله دا هیواد د افغانانو لپاره په برزخ بدل شوی او پر وړاندې یې کومه لاره نشته چې دوی وکولای شي په منظم ډول تعقیب کړي.

د جرمني د بهرنیو چارو وزارت اعلان کړی، چې د نوي بشري پروګرام په مرسته به ۳۷ زره افغان کډوال دغه هېواد ته ولېږدوي.

د بښنې نړیوال سازمان له هند څخه غوښتي چې هغه نیول شوي مهاجرین خوشې کړي چې په نوي ډیلي کې یې په کابل کې پر یوه ښوونیز مرکز د ځانمرګي برید په غبرګون کې لاریون کړی و.